Տոնածառի անվտանգության կանոնների պահպանումը

Կյանքն ու առողջությունը պահպանելու, հրդեհներից ու դրանց ծանրագույն հետեւանքներից խուսափելու, տոնական տրամադրությունը չխաթարելու համար անհրաժեշտ է խստագույնս պահպանել հրդեհային անվտանգության կանոնները:

Անվտանգության կանոններից ելնելով, բնակարանում տոնածառը թույլատրվում է տեղադրել ամուր պատվանդանի վրա, ընդարձակ սենյակում, որն ունենա մեկից ավելի տարհանման ելք: Հարկավոր է հետեւել, որ տոնածառի շրջապատն ազատ լինի զանազան դյուրավառ իրերից, իսկ ճյուղերը չդիպչեն պատերին ու առաստաղին:

Չի թույլատրվում տոնածառը տեղադրել անցումների վրա, միջանցքներում, դռան առջեւ, իսկ հեռավորությունը դյուրավառ իրերից ու առարկաներից պետք է լինի 1 մետրից ոչ պակաս:

Տոնածառի էլեկտրալուսավորությունը պետք է անցկացնի մասնագետը` փակհաղորդալարերով եւ էլեկտրատեխնիկական նորմերի եւ կանոնների պահպանմամբ: Լուսավորության համար պետք է օգտագործել 12 վոլտից ոչ ավելի հզորության էլեկտրալամպեր, իսկ դրանց ու լարերի միացման տեղերն անպայման զոդել եւ հուսալիորեն մեկուսացնել: Շատերը տոնածառը զարդարելիս օգտագործում են բամբակ, թուղթ, պլաստմասե խաղալիքներ, երեխաների համար բամբակից կոստյումներ են կարում, մինչդեռ այդ բոլորը դյուրավառ նյութեր են եւ բավական է մի փոքրիկ կայծ, որ տեղի ունենա բռնկում ու հրդեհ:

Արգելվում է տոնածառը լուսավորել մոմերով, բենգալյան կրակով հրավառություն անել եւ այդ սենյակում օգտագործել բաց կրակ: Խստորեն արգելվում է տարբերտեսակի հրավառությունների, ճայթռուկների, հատկապես` չինական արտադրության, օգտագործումը, որոնք խիստ հրդեհապայթյունավտանգ են:

Ամանորյա հանդիսությունների համար նախատեսված տեղերում անհրաժեշտ է մշտապես ունենալ հրդեհաշիջման սկզբնական միջոցներ` կրակմարիչ, ջուր, ավազ: Տոնածառերի հսկողությունը պետք է իրականացնեն նախօրոք հրահանգավորում անցած անձինք: Չի թույլատրվում փոքրահասակ երխաներին թողնել տոնածառների մոտ առանց հսկողության:

Հարցեր, պատասխաններ, մեկնաբանություններ